घटना २ः घाम तापेर पत्रिका पढ्दा
महसहितको मारीको चाका खाँदाको घटना त माहुरीले चिलेको पहिलो ब्लगमा पढ्नु भयो होला । पहिलो घटना पढि नसक्नु भएको भए यो लिंकमा क्लिक गरेर पढ्न सक्नुहुनेछ ।
अब लागौ दोस्रो घटना तर्फ…
कुरो वि.सं. २०७० साल तिरको हो । म तत्कालिन महिला तथा बालबालिका कार्यालय, बाँकेमा कार्यरत थिएँ । युनिसेफको सहयोगमा संचालन भएको पारालिगल कार्यक्रमको सुपरभाइजरको रुपमा । काम थियो बाँकेका विभिन्न गाविसमा पारालिगल समूह गठन गरी समुहका सदस्यहरुको क्षमता अभिवृद्धि गर्ने ।
कम्दि गाविस कार्यालयमा तालिमको आयोजना गरिएको थियो । म र विष्णुमाया श्रेष्ठ दिदिले तालिम सहजिकरण गरिरहेका थियौं । पुसको महिना बिहान कुहिरो लागे पनि दिउँसो पारिलो घाम लागेको थियो । मैले आफ्नो सत्र सकाएपछि विष्णुमाया दिदिले तालिम सहजिकरण गर्न थाल्नुभयो ।
पारिलो घाम लागेकाले चौरमा बसेर पत्रिका पढ्छु भनेर म बाहिर निस्किए । साथमा कान्तिपुरलगायतको पत्रिका बाकेर गएको थियो । गाविस कार्यालयको चौरमा पल्टिए । आकास तिर फर्केर पत्रिका पढ्न लागे । पत्रिका पढ्न लागेको त्यस्तै पन्ध्र मिनेट जति भएको थियो । कताबाट एउटा माहुरी आएर पत्रिकामा बस्यो । पत्रिका हल्लाए पछि माहुरी उड्यो । केहिबेरमा फेरी तीन चारवटा माहुरी आएर बस्यो । त्यसलाई पनि भगाए ।
त्यसपछि त हुरुरु आएको एक हुल माहुरीले मलाई घेरीहाल्यो । हत्त न पत्त उठे । माहुरीले मनपरि टोक्न सुरु गरिसकेको थियो । म रन्थिनिन थाले । के गर्ने कसो गर्ने सोच्नै सकेको थिएन ।
केही पर रहेको चिया नास्ता पसलको दाईले मलाई माहुरीले टोकिरहेको देखेछन् । यता आउ यता आउ भन्ने लागे । उनको पसलको पछाडी फोहर बटुलेर आगो बालेका थिए । आगो भन्दा पनि त्यो थुप्रोबाट मज्जैको धुवाँ आइरहेको थियो ।
मेरो पालो गएर त्यही धुवाँको मुस्लोमा घोप्टो परेर बसे । धुवाँले गर्दा होला अघिसम्म मलाई चिलिरहेका माहुरी भाग्न थालेका थिए । आकासमा भने माहुरी बाक्लै गरी उडिरहेका थिए ।
संजोगले मैले त्यो दिन थर्माकट र उलनको सर्ट लगाएको थिए । जाडो महिना भएकाले । त्यसले पनि मौरिले धेरै टोक्न पाएन । तरपनि १० देखि १५ वटाले त टोक्यो होलान ।
पछिमात्र थाहा भयो, म बसेको चौर दक्षिणतर्फ सिमलको अग्लो रुख थियो । त्यसमा माहुरीको पोलो रहेछ । कताबाट काग हो वा चिल आएर पोलोमा हानेर गएकोले मौरिहरु उडेका रहेछन् । माहुरीको पोलो चलाउन कता पुगे कता, म भने त्यसको सिकार बने ।
माहुरीको टोकाइको पिडा त के भनिसक्नु । तर न रुख सक्थे न कराउन । केही बेर निकै दुख्यो । माहुरीले टोकेको ठाउँमा सुन्निएको थियो ।
अर्को दिन तालिमका लागि जान पनि डर लागिरहेको थियो । तर जार्ने पथ्र्यौ । अर्कोदिन त्यहि जाँदा धेरै पटक त्यही रुखतर्फ हेरे । माहुरीले भने त्यो रुखबाट बसाई सरिसकेको रहेछ ।
माहुरीले चिलेको घटना लेखिरहँदा मेरो एक जना साथीको याद आयो । बर्दियाको जमुनीबाट फर्कदै गर्दा उनलाई पनि माहुरीले चिलेर अस्पतालनै भर्ना गर्नुपरेको थियो ।
तपाईलाई माहुरीले चिलेको छ ? छ भने आफ्नो अनुभव कमेन्टमा सेयर गर्नुहोला है ।
*कभर फोटो माइक्रोसफ्टको एआई इमेज जेनेरेटरबाट तयार पारिएको हो।
Malai chai barulaa le tokera Hanuman banaideko x gyan Jyoti school padne kram ma school saker Ghar farkada tokeko barulale dui din school gayena lajle